A "IMPROVISACIÓN FINANCEIRA" NA MANCOMUNIDADE: PAGARÁN FACTURAS PENDENTES CON AFORROS POLA INCAPACIDADE DE XESTIÓN

O Partido Popular de Cangas denuncia que a documentación da Comisión de Contas da Mancomunidade pon en evidencia o fracaso na xestión orzamentaria do ente supramunicipal. A proposta que se levará ao vindeiro martes é, na práctica, un "parche" contable: a entidade ten que tirar dos seus aforros (o remanente de tesouraría) para pagar facturas correntes de 2025 que quedaron sen abonar.

Esta situación é consecuencia directa dun erro de cálculo monumental do tripartito. O orzamento de 2026 baseouse nunha previsión de ingresos de 5,7 millóns de euros procedentes dunha nova taxa de residuos que non entrou en vigor a tempo pola oposición social á mesma.

Ao non ingresas este diñeiro nas arcas, a Mancomunidade atopouse cun "oco contable" de 3,4 millóns de euros; unha cantidade de diñeiro que, ao non existir, obrigou ao goberno a declarar "créditos non dispoñibles". En termos sinxelos, isto significa que o goberno tivo que conxelar e prohibirse a si mesmo gastar eses 3,4 millóns en servizos ou investimentos previstos porque o diñeiro que agardaban recadar é inexistente.

"Estamos ante un goberno que vive ao día, gastando os aforros do pasado para cubrir a súa incapacidade de xestión do presente", sinalan. O PP esixe que o tripartito deixe de improvisar e explique como pretenden equilibrar unhas contas que hoxe son un auténtico castelo de naipes.

Esta asfixia financeira explica a última manobra do BNG e os seus socios: solicitar ao ORAL unha revisión do censo para buscar inmobles sen declarar. Un movemento que non busca a xustiza fiscal, senón espremer máis o peto da veciñanza para tapar o seu propio buraco. "Buscan novos pagadores pero non para rebaixarlle a cota á veciñanza nin para mellorar o servizo", denuncian os populares. Para o PP, o tripartito "vive ao día, queimando os aforros do pasado para tapar a súa incompetencia actual".

Rectificación obrigada na Ordenanza

Ademais da cuestión económica, na mesma Comisión abordarase a nova aprobación inicial da Ordenanza reguladora do servizo de residuos, un trámite que o goberno se ve obrigado a repetir tras as alegacións presentadas polo Partido Popular.

"O BNG, PSOE e EU tiveron que dar o seu brazo a torcer grazas á nosa fiscalización", subliñan. O PP defenderá na Asemblea que o texto final incorpore modificacións reais en liña coas demandas dos colectivos veciñais. "Non permitiremos que esta ordenanza sexa un mero instrumento de recadación punitivista. Imos esixir que se corrixa o seu afán sancionador e se adapte ás necesidades reais da veciñanza, que non poden ser os que paguen a factura da ineficiencia deste tripartito", conclúen.