AFÁN DE PROTAGONISMO DA CONCELLEIRA DE CULTURA E A ACTITUDE DE CONFRONTACIÓN COA DEPUTACIÓN

O Partido Popular de Cangas denuncia a saída de ton da concelleira de Cultura, Xiana Abal, ao acusar á Deputación de Pontevedra de “contraprogramar” A Defensa da Vila coa celebración do concerto de Carlos Núñez en Aldán. Desde o PP aseguran que a concelleira de Cultura “non se entera” do que sucede no seu propio departamento.

A Deputación de Pontevedra mantivo en todo momento a coordinación coa área municipal de Cultura e, segundo os populares, en ningún momento o Concello puxo problemas á celebración do evento. Todo o contrario: a actuación foi comunicada e coordinada previamente co departamento municipal. Para o PP, as declaracións da edil responden exclusivamente ao seu afán de protagonismo e á necesidade permanente de buscar unha confrontación política, mesmo cando se trata de algo tan positivo para Cangas.

“En lugar de alegrarse de que Carlos Núñez veña a Cangas, de que haxa actividade cultural e de que Aldán acolla un concerto deste nivel, a concelleira prefire buscar un conflito que non existe”, sinalan. O grupo maioritario da Corporación considera especialmente grave que o goberno municipal tente presentar como un ataque político unha actuación cultural que contribúe a dinamizar Cangas, atraer visitantes e ampliar a oferta cultural do municipio.

“Non entendemos esa forma de facer política. Cangas debería celebrar que veñan eventos, independentemente de quen os organice ou de que administración os impulse”, apuntan. Os populares consideran que esta polémica é un novo exemplo da falta de lealdade institucional do goberno do BNG, PSOE e EU, máis preocupado por confrontar coa Deputación ou coa Xunta que por aproveitar as oportunidades que chegan ao municipio.

“Mentres eles están máis preocupados por buscar inimigos e alimentar polémicas, nós estamos preocupados por que Cangas teña máis actividade, máis visitantes e unha programación cultural cada vez mellor”, sinalan. Desde a formación lembran que todas as administracións teñen que sumar e que o único que debería importar é que os veciños e visitantes dispoñan dunha oferta cultural ampla e de calidade. Por iso, os populares aseguran que seguirán traballando para que a axenda cultural de Cangas continúe medrando, veñan os eventos de onde veñan e sexan organizados por quen sexan.

“É o que quere a inmensa maioría dos cangueses e canguesas: que pasen cousas en Cangas, que o municipio estea vivo e que as distintas administracións colaboren para facelo posible”, conclúen.