BNG E PSOE DEIXAN NO CAIXÓN 3,45 MILLÓNS EN OBRAS MENTRES ACUMULA 6,46 MILLÓNS DURMINDO NOS BANCOS

Apenas executaron o 36% dos investimentos orzamentados para mellorar as parroquias e servizos. Unha mostra da súa incapacidade de xestión, que mantén millóns retidos nas contas mentres as rúas e instalacións municipais sofren un total abandono.

O Partido Popular de Cangas revelou un novo bloque de datos extraídos da Conta Xeral de 2025 que demostra a parálise inversora que atravesa o Concello. Segundo reflicte a liquidación oficial, o goberno local só foi quen de executar 2.001.749,27 euros dos 5.456.695,42 euros que tiña consignados para obras e melloras no Capítulo 6 (Investimentos Reais), deixando sen gastar 3.454.946,15 euros, o que supón que o 63,32% dos fondos previstos quedou sen executar.

Desde o grupo maioritario da Corporación subliñan a contradición que supón esta falta de proxectos nun Concello que dispón de liquidez económica récord. O informe de Arqueo oficial a 31 de decembro de 2025 certifica que o Concello de Cangas tiña 6.462.562,15 euros paralizados en contas correntes bancarias. «A Cangas non lle faltan recursos económicos; fáltalle un goberno con capacidade de xestión para transformar eses cartos en obras útiles para a veciñanza», sinalan.


A parálise nos proxectos municipais afectou de cheo a servizos e infraestruturas esenciais en todo o termo municipal. A partida destinada a edificios municipais e construcións (Artigo 622) rexistrou un dos maiores índices de inexecución, xa que de 1,46 millóns de euros definitivos apenas se recoñeceron 91.424,28 euros, quedando o 93,7% do orzamento sen tocar e 1,37 millóns sen investir.

Esta mesma situación de bloqueo repítese nas instalacións deportivas, onde o goberno local deixou sen executar máis de 1,41 millóns de euros ao gastar unicamente 158.444,67 euros dos 1,57 millóns dos que dispoñía. Nas actuacións de mobilidade urbana a parálise foi case absoluta, cun gasto real de apenas 2.649,90 euros fronte a un crédito dispoñible de máis de 331.000 euros, deixando o 99,2% das intervencións sen facer.


Melloras pendentes
O desleixo nos proxectos públicos tamén se fixo evidente no mantemento e pavimentación das vías públicas municipais, onde quedaron sen utilizar preto de 380.000 euros consignados no orzamento para o arranxo de camiños e accesos nas distintas parroquias de Cangas.

«Non é de recibo que os veciños sufran beirarrúas deterioradas, espazos deportivos pechados ou camiños sen asfaltar mentres o goberno local presume de ter máis de 6,4 millóns de euros durmindo no banco», destacan os populares, incidindo en que a propaganda de supostos superávits do bipartito só agocha unha incapacidade manifesta para xestionar e licitar as obras que Cangas precisa.