"COVARDÍA" DUN GOBERNO SEN RUMBO QUE SE ABSTIVO NA SÚA PROPIA PROPOSTA DE VIVENDA PÚBLICA

O Partido Popular de Cangas cualificou hoxe de "esperpento político e paradoxo histórico" o acontecido no último Pleno da Corporación, onde o goberno tripartito decidiu absterse nunha proposta sobre a construción de vivenda pública que fora levada á sesión polo propio executivo local.

Para a formación popular, este feito é o reflexo da "covardía dun goberno sen rumbo". Os populares lembran o circo mediático e administrativo orquestrado nos último mes polo tripartito: primeiro anunciaron a convocatoria dun Pleno Extraordinario para tratar o asunto e, despois de enredar cunha Xunta de Portavoces e buscar unicamente titulares na prensa, decidiron lavar as mans e absterse na votación definitiva.

"O único obxectivo desta manobra foi non dinamitar o seu propio goberno. É a constatación de que estamos ante un executivo cos intereses dos socios totalmente enfrontados, socios que se pregan constantemente a directrices alleas e que ignoran por completo o interese xeral de Cangas", denuncian desde a formación.

O grupo maioritario da Corporación critica a actitude da alcaldesa, a nacionalista Araceli Gestido, á que acusan de prepotencia institucional. "A rexedora medra no Pleno, copiando os modos ditatoriais de Moaña para silenciar á oposición. Pero iso é o único que sabe copiar dos concellos veciños, porque á hora da verdade demostra ser absolutamente incapaz de pelexar para traer vivenda pública a Cangas e de manter a orde no seu propio goberno", sinalan.

O voto decisivo do PP para 300 familias

Fronte á parálise institucional, o Partido Popular subliñou que o seu compromiso coa vivenda demóstrase con feitos e con iniciativa política. Neste sentido, os populares lembran que a vía do Plan de Interese Autonómico (PIA) naceu precisamente dunha moción do Partido Popular, que apostou desde o primeiro momento por esta figura urbanística para promover a vivenda pública no municipio.

Debido a ausencias e abstencións no goberno, foi o voto afirmativo do Partido Popular o que garantiu a aprobación da iniciativa, evitando que a inoperancia do BNG, PSOE e EU fixese naufragar o proxecto.

Unha iniciativa que dá hoxe un novo paso adiante imprescindible para que a Xunta de Galicia comece a súa tramitación autonómica, co gran obxectivo no horizonte de poder comezar a súa construción no ano 2028.

"O Partido Popular non vai deixar escapar unha oportunidade histórica que beneficiará directamente a 300 familias canguesas que precisan dun fogar. Hoxe quedou claro quen ten iniciativa e quen bloquea. Non imos permitir que Cangas volva poñerse á cola do desenvolvemento e das políticas sociais, que é exactamente onde nos puxeron o BNG e os seus socios durante todos estes anos, tamén en materia de vivenda pública", conclúen os populares.