NOVA CACICADA DO TRIPARTITO AO PRETENDER APROBAR POR URXENCIA A CONTA XERAL TRAS MESES DE ATRASOS

O Partido Popular de Cangas denuncia un novo atropelo do goberno municipal, que hoxe pretendeu incorporar por urxencia a aprobación da Conta Xeral de 2025 a un Pleno extraordinario convocado inicialmente para o sorteo das mesas electorais. A declaración de urxencia non prosperou debido ao voto contrario dos populares, polo que o asunto non chegou a debaterse.

Para o PP, o sucedido é unha nova mostra da falta de rigor e planificación dun goberno que leva meses incumprindo os prazos legais e que agora pretende trasladar á Corporación as consecuencias da súa propia improvisación. “Estamos ante unha nova chapuza administrativa que o goberno pretendeu resolver cun atropelo aos procedementos ordinarios. Primeiro incumpren os prazos legais, despois deixan pasar o Pleno ordinario e finalmente pretenden que toda a Corporación asuma as consecuencias da súa falta de planificación», denuncian os populares.

O pasado xoves 29 de outubro, o goberno convocou un Pleno extraordinario para o martes 3 de novembro cun único punto na orde do día: o sorteo das mesas electorais. Ao día seguinte, venres 30 de outubro, celebrouse o Pleno ordinario da Corporación, no que o goberno non incluíu a aprobación da Conta Xeral. Porén, o luns 2 de novembro, a menos de 24 horas da celebración do Pleno extraordinario, o goberno comunicou unha modificación da convocatoria para incorporar a aprobación da Conta Xeral mediante o procedemento de urxencia. “Que cambiou entre o venres e o luns para que un asunto que non consideraron necesario levar ao Pleno ordinario se convertese de súpeto nunha urxencia? Como se pode xustificar esta maneira de actuar?”, preguntan desde a formación.

O grupo maioritario da Corporación lembra que a lexislación establece, con carácter xeral, unha antelación mínima de dous días hábiles para a convocatoria dos plenos, agás nos supostos legalmente previstos de urxencia. Neste caso, a incorporación da Conta Xeral comunicouse o día anterior á sesión, sen respectar a antelación ordinaria. “A urxencia non pode converterse nunha escusa para compensar a falta de planificación do goberno nin para menosprezar os procedementos e o traballo dos grupos da oposición”, sinalan.

Tramitación marcada polos atrasos

O PP lembra que esta situación non é un feito illado, senón o resultado de meses de atrasos na tramitación da Conta Xeral de 2025. A lexislación establece que este documento debe ser informado pola Comisión Especial de Contas antes do 1 de xuño. Porén, en Cangas a comisión non se celebrou ata o 5 de agosto, máis de dous meses despois do prazo legal. Posteriormente, a Conta Xeral someteuse a exposición pública mediante un anuncio publicado no Boletín Oficial da Provincia o 18 de setembro. A pesar diso, o goberno deixou pasar o prazo legal do 1 de outubro para sometela á aprobación plenaria e tampouco levou o asunto ao Pleno ordinario do pasado 30 de outubro.

“O goberno tivo meses para tramitar a Conta Xeral e varias semanas para organizar a súa aprobación. Non estamos ante unha urxencia sobrevida, senón ante as consecuencias dunha xestión sen previsión nin rigor”, critican os populares. A formación lembra, ademais, que xa advertira publicamente dos atrasos na tramitación deste expediente e das súas posibles consecuencias, sen que o goberno corrixise a situación a tempo.

O PP rexeitou a urxencia, non a aprobación

O Partido Popular quere deixar claro que o seu voto contrario no Pleno de hoxe non foi contra a aprobación da Conta Xeral, senón contra a maneira na que o goberno pretendía incorporala á orde do día. Os populares consideran que a alcaldesa debe explicar por que non levou este asunto ao Pleno ordinario do venres e que circunstancias xustificaban a súa tramitación urxente apenas tres días despois. “Non imos avalar que o goberno converta os seus incumprimentos nunha urxencia para toda a Corporación. O respecto aos prazos legais, aos procedementos e aos dereitos dos concelleiros non é opcional”, sinalan.

Desde o Partido Popular esixen ao goberno municipal que abandone a improvisación, respecte os procedementos legais e cumpra coas súas responsabilidades. “Cangas merece un goberno que traballe con rigor, que planifique e que cumpra os prazos. Non un goberno que pretenda solucionar cun atropelo de última hora o que non foi capaz de facer durante meses”, conclúen.