O CONCELLO PAGOU CASE 1,8 MILLÓNS DE EUROS EN SERVIZOS SEN CONTRATO, UNHA PRÁCTICA QUE A INTERVENCIÓN EQUIPARA A CONTRATOS VERBAIS PROHIBIDOS POLA LEI.

O Partido Popular de Cangas deu a coñecer unha nova batería de datos oficiais da Conta Xeral de 2025 que revela a gravidade e a desorde na contratación municipal. Segundo os informes emitidos polo órgano de control interno, o BNG e os seus socios tramitaron ao longo do pasado ano un total de 34 expedientes de omisión da función interventora por un importe de 1.791.975,55 euros correspondentes a servizos que se estiveron a prestar sen contrato vixente nin concurso público en vigor.

Desde o grupo maioritario da Corporación aclaran que non se trata de gastos puntuais ou urxencias sobrevidas, senón dunha práctica continuada de prórrogas tácitas irregulares. «Ao ter os contratos totalmente extinguidos e non sacar os novos pregos a concurso en tempo e forma, o goberno mantén as empresas traballando en vía de feito, unha situación de precariedade que a propia Intervención e a doutrina xurídica equiparan a contratacións verbais expresamente prohibidas polo artigo 37.1 da Lei de Contratos do Sector Público», denuncian.

A documentación fiscalizadora certifica que prestacións moi sensibles para a veciñanza operaron durante o exercicio 2025 nesta situación de irregularidade continuada. O caso máis significativo é o do Servizo de Axuda no Fogar (SAF), que atende a persoas dependentes e cuxa facturación mensual supera os 100.000 euros sen contrato ordinario vixente.

Este colapso no SAF arrastrouse ao longo do último ano pola incapacidade de xestión do executivo local: tras un primeiro intento errado no que a licitación quedou deserta, o contrato adxudicouse finalmente este ano pero o relevo da empresa estivo paralizada por un recurso especial presentado pola anterior adxudicataria, prolongando a interinidade do servizo aínda hoxe.

Unha situación máis grave de parálise dáse na xestión da piscina municipal, cun contrato caducado xa no inicio do anterior mandato e que aínda hoxe atópase co contrato vencido. “Pese as advertencias técnicas e mocións presentadas o BNG e os seus socios continúan negándose a poñer fin a esta irregularidade cunha nova licitación” critica a formación. Algo que se repite noutros servizos municipais que operaron sen cobertura como o guindastre, o mantemento de ascensores dos edificios públicos, a consultoría acústica ou o tratamento de residuos.

Avisos de nulidade

A gravidade de manter prestacións sen soporte contractual levou á Intervención Municipal a propor formalmente en 15 destes expedientes a revisión de oficio por concorrer causa de nulidade de pleno dereito, ao abeiro do artigo 47 da Lei 39/2015, advertindo ademais de que este anómalo funcionamento pode derivar na esixencia de responsabilidades administrativas e patrimoniais.

A pesar destas contundentes advertencias técnicas, a Alcaldía asinou sistematicamente resolucións en apenas 24 ou 48 horas para ordenar o pago das facturas apelando á figura do «enriquecemento inxusto». O Partido Popular lembra que esta vía xurídica existe unicamente como mecanismo excepcional para non prexudicar a terceiros de boa fe que xa fixeron o traballo, pero non pode converterse na fórmula habitual de goberno para esquivar a obriga legal de licitar os servizos.

«O BNG, PSOE e EU levan case 12 anos gobernando e non poden escudarse en escusas cando é a súa propia desidia a que mantén en precario os servizos máis básicos de Cangas; os veciños merecen contratos legais, licitacións en tempo e forma e total transparencia. En definitiva, xestión.», conclúen.