O TRIPARTITO GARDOU A CONTA XERAL NUN CAIXÓN DURANTE MÁIS DE 40 DÍAS FACENDO IMPOSIBLE CUMPRIR A LEI E APROBALA EN PLENO

O Partido Popular denuncia a grave neglixencia e a parálise administrativa do goberno local de BNG, PSOE e EU, que vén de consumar un incumprimento dos prazos legais establecidos na normativa estatal para a tramitación e aprobación da Conta Xeral do Concello correspondente ao exercicio 2025.

Dende a formación lembran que o artigo 212 do Texto Refundido da Lei Reguladora das Facendas Locais (TRLRHL) fixa un calendario imperativo para garantir o control democrático das finanzas municipais: a Conta Xeral debía estar ditaminada antes do 1 de xuño e aprobada obrigatoriamente polo Pleno da Corporación antes do 1 de outubro, co gallo de remitila ao Consello de Contas de Galicia e ao Tribunal de Cuentas antes do 15 deste mes.

O grupo maioritario da Corporación subliña que esta situación non colle por sorpresa a ninguén porque o PP xa alertou formalmente de que isto ía suceder na sesión plenaria celebrada o pasado 26 de xuño. Nese debate, a concelleira de Facenda, Xiana Abal, faltou á verdade e afirmou publicamente ante a Corporación que a Conta Xeral tiña como data límite para a súa aprobación o 30 de outubro, inventando un prazo inexistente na lexislación de facendas locais.

Dende o PP sinalan que resulta difícil saber que é máis preocupante nunha responsable económica municipal: “se a súa manifesta ignorancia do procedemento administrativo e legal básico, ou a súa absoluta falta de responsabilidade e incapacidade de xestión”.

44 días de parálise

A formación popular desvelou que este incumprimento consumado non obedece a un contratempo técnico imprevisto, senón á desidia do executivo de Araceli Gestido. Malia acumular xa máis de dous meses de atraso sobre o calendario legal, a Comisión Especial de Contas ditaminou favorablemente o expediente o pasado 5 de agosto de 2026. Nese momento, o goberno local aínda dispoñía de marxe para remitir de inmediato o anuncio ao Boletín Oficial da Provincia e chegar a tempo ao debate plenario ordinario de setembro.

Porén, o tripartito gardou o expediente nun caixón durante 44 días, non publicando o preceptivo anuncio no BOPPO ata o 18 de setembro. Ao esixir a lexislación un prazo obrigatorio de 15 días hábiles de exposición pública máis outros 8 días hábiles adicionais para a presentación de reparos ou reclamacións, o goberno de BNG, PSOE e EU provocou de xeito directo e deliberado que fose matematicamente imposible someter as contas ao Pleno antes do prazo improrrogable do 1 de outubro.

Risco de perder axudas

Os populares advirten de que este descontrol administrativo carrexa graves consecuencias prexudiciais para Cangas. A Lei de Orzamentos da Comunidade Autónoma de Galicia e a práctica totalidade das liñas de subvencións esixen ter as contas debidamente rendidas en prazo ante o Consello de Contas de Galicia como requisito indispensable para cobrar liquidacións ou concorrer a novos fondos públicos, a maiores do risco de retención da Participación nos Tributos do Estado (PTE) por parte do Ministerio de Facenda.