TRIPARTITO CONXELA AS AXUDAS AOS CLUBS DEPORTIVOS MALIA A RECADACIÓN RÉCORD E O ACORDO PLENARIO POR UNANIMIDADE

O goberno de BNG, PSOE e EU mantén conxelados 100.000 euros para as entidades locais, desatendendo o mandato plenario de acadar o 1% do orzamento. Unha falta de apoio ao tecido deportivo inxustificable nun tripartito que manexa máis de 20 millóns, mentres abandona ás directivas para que asuman en solitario o aumento disparado dos custos federativos, arbitraxes e desprazamentos.

O Partido Popular de Cangas denuncia o flagrante incumprimento por parte do goberno local de BNG, PSOE e EU do acordo plenario que obrigaba a incrementar de forma substancial as axudas económicas destinadas aos clubs deportivos do municipio. A pesares de que o Pleno corporativo de xaneiro aprobou por unanimidade unha moción popular que instaba a actualizar estas partidas e fixar como horizonte que o 1% do orzamento municipal fose destinado ao tecido deportivo local, o executivo da nacionalista Araceli Gestido decidiu conxelar os fondos, mantendo exactamente as mesmas contías insuficientes dos últimos anos.

Para a formación maioritaria da Corporación, esta decisión supón unha aldraxe directa ao esforzo diario de directivas, técnicos, deportistas e familias que sustentan o deporte base e federado en Cangas. A contía global de 100.000 euros —a repartir entre preto de 25 entidades locais— resulta manifestamente insuficiente ante a suba xeral dos custos de desprazamentos, mutualidades, arbitraxes, seguros e material de adestramento. Esta conxelación é aínda máis inxustificable nun momento no que o Concello presume dunha recadación histórica e dun orzamento que supera os 20 millóns de euros.


Dende o PP critican con dureza a hipocrisía política dun tripartito que maltrata sistematicamente ao tecido asociativo e acumula promesas incumpridas: “Votan a favor nos plenos para salvar a cara e despois deixan aos clubs totalmente abandonados. Só se acordan dos nosos deportistas para subirse ao carro da foto cando chegan as medallas e os éxitos nas competicións, pero á hora de apoialos na súa actividade diaria o compromiso é cero”.

Esta actitude resulta especialmente dolorosa cun deporte local que é referente fóra das nosas fronteiras, cun club de balonmán que compite na máxima categoría estatal paseando o nome de Cangas por toda España sen contar co respaldo institucional que merece.


Nave de Deportes Náuticos
O desleixo municipal co deporte ten o seu reflexo no abandono das instalacións, coma a Nave de Deportes Náuticos. O goberno de Gestido anunciou na primavera a bombo e prato que destinaría 100.000 euros dos remanentes á renovación integral da cuberta tras reunirse en Santiago con Portos de Galicia para solicitar a preceptiva autorización.

A realidade, meses despois, é que o tripartito non só borrou esta partida do expediente de remanentes levado ao Pleno de setembro, senón que nin sequera consta que teñan redactado o proxecto técnico. Mentres a chuvia segue entrando na instalación, estragando o material do Club de Remo Vila de Cangas e poñendo en risco a seguridade dos deportistas, o goberno local segue instalado na propaganda e nos titulares ficticios, demostrando unha incapacidade de xestión alarmante que prexudica directamente aos deportistas de Cangas.